Taktu ekki mark á heilanum...

....að minnsta kosti ekki alltaf. Hann er eins og súpertölva sem geymir ótrúlegustu hluti, bæði góða og slæma, gagnlega og ónothæfa. Heilinn er eins og tölva sem sendir alls kyns upplýsingar á vitundarskjáinn þinn –hugann.

Þér koma alls konar hlutir í hug, sumir góðir og ganglegir, en en líka aðrir sem þú ættir þegar í stað að senda í ruslakörfuna. Við höldum gjarnan að það sem kemur í huga okkar hljóti að vera sannleikanum samkvæmt, en það er ekki alltaf svo. Stundum detta okkur í hug hlutir sem eru vafasamir og einfaldlega rangir. En hvernig eigum við að átta okkur á hvað gera skuli við hugsanirnar sem “birtast á skjánum”?

Skoðum málið aðeins betur. Þú upplifir sjálfan þig sem “ég”. Þú hefur vitund sem skynjar að þú ert þú. Þú ert ekki einhver annar. Þú hefur tilfinningu fyrir því að vera til. Þú hugsar, ályktar, tekur ákvarðanir og framkvæmir. Hvað er þetta “ég” í okkur? Hvað er þessi hugur okkar sem hefur vitund um að “ég” er til? Það er andinn sem í þér er. Hann er frá Guði, eilífur og einstakur. Það er hann sem á að meta allt sem heilinn í þér leggur fyrir þig, bendir þér á og stingur uppá. Þess vegna eigum við ekki að verða áhyggjufull þótt heilinn bendi okkur á ýmsan vanda sem hann kallar fram af “harða diskinum” í okkur.

Heili margra er uppfullur af alls konar misskilningi, röngum upplýsingum, vantrú og vanþekkingu. Og vegna þess að margir halda að þessar hugsanir eigi að taka alvarlega, þá taka þeir margar rangar ákvarðanir, segja og gera margt vitlaust sem skaðar sjálfa þá og aðra. Allt sem heilinn í okkur sendir inn á “skrifborðið” okkar eða birtir á “skjánum” okkar þarf hugurinn, andi okkar, upplýstur af Heilögum anda og Orði Guðs, að meta, hvort sé gagnlegt og gott eða slæmt og ónothæft.

Við megum ekki láta stjórnast af hinu og þessu sem okkur kemur í hug, þá er hætt við því að “holdið” hafi stjórnina. Heilinn er bara eins og tæki, tölva, sem geymir fullt af upplýsingum, en hann kann ekki alltaf að vinna rétt úr þeim. Það er hlutverk andans, hugarins, já, “þín” að gera. Með því að láta andann í okkur hafa síðasta orðið, getum við strax afgreitt út af borðinu ýmislegt sem ekkert vit er í að hugsa frekar um eða framkvæma.

Páll postuli ráðleggur okkur í Rómverjabréfinu (12:2) að taka upp breytt líferni með því hugsa öðruvísi en við vorum vön, og þá munum við fá að skilja hvað Guð vill að við gerum, allt það sem er gott, fagurt og fullkomið. Það er til mikils að vinna!

Athugasemdir

[Jón Steinar Ragnarsson, 20.11.2013 kl. 07:26]

Þetta er sennilega það hrokafyllsta og sjálfumglaðasta sem ég hef lesið. Hvenær varðst þú sérfræðingur í starfsemi heilans og hvað gefur þér vitneskju um hvað er marktækt eða ekki, sem þar á sér stað?

Ekki ertu sérfræðingur i þessu á neinu sviði, svo maður ætlar að þetta séu svona ábyrgðalausar spekúlasjónir settar fram í fullyrðingaformi.

Þú gengur svo út frá því vísu að þinn "guð" sé raunverulegur án þess að geta vitað það. Það er ályktun þín byggð á trú en ekki staðreyndum. Það er jú skilgreining trúar að þurfa ekki staðreyndir. Staðreyndir eru ekki trúaratriði. Þetta eru því andhverfur, trú og raunveruleiki.

Er ekki spurning um hvort þú sért ekki haldinn einhverjum samslætti í heilanum?

Hverja ertu að reyna að heilaþvo með þessu dæmalausa rugli?

[Guðmundur Pálsson, 20.11.2013 kl. 11:18]

Þakka þér fyrir góðan pistil Friðrik. Það er hverju orði sannarra að margar tilfinningar og hugsanir geta vaknað í "hita leiksins" sem maður tjáir í flýti en við umhugsun skilur að maður hefði betur ekki tjáð, heldur haldið inni. Þetta gildir fyrir okkur öll, við missum sjónar og gerum það sem rangt er. Það er auðvitað sjálfselskan sem veldur þessu. Kristnir menn tala um leiðsögn Heilags Anda og Guðs Orð sem leiðrétta manninn. Og svo bænin auðvitað. Það hjálpar mikið að skilja að maðurinn hefur fallið í synd og hann kemst ekki úr þessu ástandi nema með hjálp Guðs. Þetta er sígild kristin útskýring og hún er traust. Góð kveðja.

[Gísli H. Friðgeirsson (IP-tala skráð) 20.11.2013 kl. 13:34]

Þetta er snjöll líking sem notað nútíma tækni sem allir eru farnir að þekkja, a.m.k. yngir kynslóðirnar.

Hér er verið að miðla visku byggða á mannlegri reynslu og boðskap um hver mikilvægt er að hafa stjórn á huga sínum.

Viðhorfin byggja á trú og mér datt ekki í hug að þetta væri vísindagrein, eins og athugasemd hér að ofan ber með sér.

Takk fyrir þetta Friðrik.